Registrere epoastačujuhusa vuostáiváldit ođasreivve ja dieđu go giinu cealká.
 
Govvagalleri

Sápmi Talent 2013


GOVVEN bargobáji govat


Jeagilveagi geasseleaira 8.-10.8.2012
 
Čálit!
Gollegiella

Davviriikkalaš sámegiela giellabálkkašupmi - Gollegiella - juhkkui 12. beaivve skábmamánu 2008 goalmmát geardde. Bálkkašumi dárkkuhussan lea bealistis bargat dovddusin Norggas, Ruoŧas, Suomas ja Ruoššas geavahuvvon sámegiela ovddideami ja seailluheami buorrin dahkkon barggu. Bálkkašumi sáhttá mieđihit ovttaskas olbmuide dahje servošiidda, geat leat ánssolaččat bargan sámegiela ovddideami ja seailluheami buorrin.



Bálkkašupmi juhkkojuvvo juohkke nuppi jagi. Bálkkašumi juhkkui vuosttas háve jagis 2004 ja dalle bálkkašupmi geigejuvvui Anárašgiela searvái ja máttasápmelaš Ella Holm Bullii. Nuppes bálkkašupmi juhkkojuvvui 2006:s ja dalle dan oažžuiga nuortalašgiela ovddideaddji Jouni Moshnikoff ja davvisápmelaš Harald Gaski. Čuovvovaš háve bálkkašupmi juhkkui jagis 2008 ja 12 500 € giellabálkkašumi juogadedje ubmisámegiela oahpaheaddji Henrik Barruk Deartnas ja sámegiela geavaheami ovddideaddji Ohcejoga sámesearvvi Sámi Siida.



Sámi Siidda boahta válljema árvvoštallanlávdegoddi ákkastalai čuovvovaččat:

Sámi Siida ánssáša bálkkašumi guhkesáigásaš barggus sámegiela buorrin Ohcejoga gielddas. Searvi lea 1970-logu rájes ovddidan sámegiela ruovttugielddastis ja lea iežas bargguin leamaš váikkuheamen maiddái dasa, ahte giellamolsun lea gielddas bisánan ja dili lea dál jorggihan buoret guvlui. Sámegiela sajádaga buorideapmi Ohcejoga gielddas lea dávjá álgán Sámi Siidda evttohusain, gáibádusain ja geavatlaš barggus. Sámi Siida lei njunnošis gáibideamen sámegiela Ohcejoga gieldda virgegiellan ja lea sihke dalle ja dan maŋŋá ovddidan sápmelaččaid gielalaš vuoigatvuođaid. Sámi Siida lea maiddái olles áigge ovddidan sámegielat oahpahusa ja sámegielat beaiveruovttu vuođđudeami Ohcejohkii.

Sámi Siida ánssáša bálkkašumi maiddái dainna, go lea álo vuoruhan sámegiela iežas barggus. Searvi doaimmain sámegiella lea ÁLO váldogiellan ja dábálaččat áidna geavahuvvon giella. Sihke lahttureivvet ja ruovttusiiddut interneahtas leat sámegilli. Čoahkkimat ja dáhpáhusat lágiduvvojit sámegilli ja dábálaččat dat eai dulkojuvvo. Maiddái mánáide ja nuoraide čujuhuvvon doaimmain sámegiella lea áidna geavahuvvon giella.

Sámi Siida lágidan ná sápmelaččaide eanet giellaarenaid main sáhttá geavahit sámegiela. Seammás dát giellaarenat leat báikkit gos giela oahpahallit besset hárjehallat guldalit ja geavahit sámegiela. Mánáide, nuoraide ja bearrašiidda čujuhuvvon doaimma lassin searvi lea lágidan máŋggaid gurssaid, čájáhusaid, oahppomátkkiid, kulturfálaldagaid, konsearttaid ja sámi kultuvrra dokumenterenprošeavttaid. Sámi Siida lea maiddái álo ávžžuhan guovllu suopmelaččaid ieža oahpahallat sámegiela ja diktit iežaset mánáid oahppat sámegiela skuvllain ja beaiveruovttuin.

Dálá dilis sámegiella lea Ohcejogas gieldda virgegiella, gildii lea vuođđuduvvon sámegielat oahpahus buot go1ma skuvlii ja gielddas leat guokte sámegielat beaiveruovttu. Suopmelaččain mearkkašahtti oassi leat oahppan sámegiela. Sámegielat mánáid mearri lea sturron mealgat, man dihte sámegiella ii leat jávkamen Ohcejogas muhto giella lea baicce ealáskeamen. Buot dat ovdáneapmi lea maiddái Sámi Siidda barggu ánsu.



Gollegiella árvvoštallanlávdegotti vuođuštusat suomagillii, sámegillii ja ruoŧagillii

Suoma vuoigatvuohtaministera Tuija Brax sáhkavuorru bálkkašumi geigendilálašvuođas

Suoma sámedikki sátnejođiheaddji Juvvá-Lemet, Klemetti Näkkäläjärvi sáhkavuorru bálkkašumi geigendilálašvuođas

Ubmisápmelaš giellabargi Henrik Barruk sáhkavuorru bálkkašumi geigendilálašvuođas

Sámi Siidda sátnejođiheaddji Erkke-Issát-Ovllá Kati, Kati Eriksen sáhkavuorru bálkkašumi geigendilálašvuođas